Խոսիր այնպես, որ քեզ լսեն

Այս փոքրիկ հնարքները ստիպում են ներկաներին դադարեցնել այն, ինչով զբաղված են և համակ ուշադրությամբ հետևել ասածներիդ:

Իրավիճակ
Աշխատանքային հանդիպում ղեկավարության հետ

Հնարք
Խնդիրն առաջինը ինքդ բարձրացրու, սակայն սպասիր մինչև քննարկվող նախորդ թեման վերջնականապես ավարտվի:

Արդյունավետություն
Եթե դու միակն ես, ով բարձրաձայնում է թեման, մարդիկ դա ինքնատիպ գաղափար կհամարեն և ավելի մեծ ուշադրությամբ կլսեն քեզ:

Իրավիճակ
Ընթրիք ընկերների հետ

Հնարք
Սեղանի շուրջ տեղավորվիր կենտրոնում և, երբ ցանկանում ես որևէ բան ասել, ձայնդ մի փոքր բարձրացրու, ապա աստիճանաբար խոսիր մեղմ տոնով:

Արդյունավետություն
Երբ դու նստած ես կենտրոնական հատվածում, ոչ ոք ստիպված չի լինի շրջվել՝ խոսելիս քեզ լսելու կամ քո ուղղությամբ նայելու համար:

Իրավիճակ
Ընկերդ չի պոկվում իր iPhone-ից

Հնարք
Սպասիր մինչև որ վերջացնի գրելը, հետո սկսիր խոսքդ հետևյալ հնարամիտ արտահայտությամբ. «Լսի՛ր, սա քեզ կհետաքրքրի...»։

Արդյունավետություն
Այս բառերն անմիջապես նրան են վերաբերում, և հավանականությունը մեծ է, որ, դրանք լսելով, նա անմիջապես կշեղվի:

Սպասի՛ր: Միշտ չէ, որ ներքին զգացողությունը ճիշտ է

Ներքին զգացողություններին վստահելը կարևոր է, հատկապես երբ կանխազգում ես վերահաս վտանգը: Սակայն փորձագետները նշում են, որ երբ հերթը գալիս է կարևոր որոշումներ կայացնելուն, ներքին զգացողությունը կարող է ոչ միայն ճիշտ չլինել, այլև մոլորեցնել: Որպեսզի հասկանաս` ինչ է իրականում կատարվում, գրի առ այն ամենը, ինչը կարող է կապ ունենալ դրա հետ, ապա բարձրաձայն կարդա. ուշադրություն դարձրու՝ այդ բառերից որն է քեզ մոտ թրթիռներ (ռեակցիա) առաջացնում:

Այնպես արա, որ քչփչան քո մասին

Ինչպես հանրահայտ աստղերի օրինակն է ցույց տալիս, եթե մշտապես ներկա ես ամենուրեք, սկսում ես կորցնել գրավչությունդ: Հետևաբար, եթե չընդունես բոլոր իրադարձությունների հրավերները և տպավորություններիդ մասին էլ գրառումներ չանես Twitter-ի կամ Facebook-ի քո էջում, մարդիկ ավելի շատ կսպասեն քո ներկայությանը: Երբ անհասանելի ես, ավելի առեղծվածային ես ու խորհրդավոր, և քո ուղղությամբ ավելի հետաքրքրասեր աչքեր են սևեռված: Բավական է միայն հայտնվես հորիզոնում, և նրանք ոչնչի առջև կանգ չեն առնի` քո մասին որևէ մանրամասն բացահայտելու համար:

Ակնթարթային շտկում. վերացրու բարձր խոսելու սովորությունդ

Մի՞շտ ես, արդյոք, նախադասությունը սկսում բարձր տոնից, այնպես, ասես հարց ես տալիս, նույնիսկ երբ ասելիքդ հարցի տեսքով չէ: Դա բարձրախոսություն է և վատ է: «Քեզ թվում է՝ այդկերպ մտերմիկ տոն ես ստեղծում, մինչդեռ իրականում անքաղաքավարի և անլուրջ մարդու տպավորություն ես թողնում: Խնդրիր ընկերներիդ նկատողություն անել քեզ, երբ սկսում ես ձայնդ գլուխդ գցած խոսել. այդպես շատ կարճ ժամանակում կազատվես այդ սովորությունից:

Պապարացի ընկերդ. «վնասազերծիր» նրան

Մինչև կհասցնես բղավել «ոչ», նա արդեն լուսանկարել է քեզ և նկարդ Facebook-ով ի ցույց դրել ամբողջ աշխարհին: «Խեղդիր» նրա մտադրությունը դեռ չծնված: Հենց ամենասկզբում հանդիպման վայրը «փակ գոտի» հայտարարեք, ինչը նշանակում է, որ հրապարակումներն արգելված են:

Ի՞նչ սխալ. նման բան չի եղել

Երբեմն հրապարակավ ստեղծված անհարմար իրավիճակներին պետք է վերաբերվել այնպես, ասես նման բան չի էլ եղել: Հետևյալ օրինակներից դասեր քաղիր՝ ինչպես կարելի է հմտորեն հարթել անցանկալի իրավիճակը:

Պահպանակի ընկնելը, երբ Զակն անցնում էր կարմիր գորգի վրայով

Նա վերցրեց այն, դրեց գրպանը և շարունակեց քայլել: Խայտառակությունը կանխված է։ Բրավո՛:

Քլոեի՝ ուղիղ եթերում մարմնի չնախատեսված բացվածքը

Ուղիղ եթերում զգեստի հետ կապված անհարմարությունից հետո նա իր բլոգում հումորային գրառում արեց՝ ստիպելով մարդկանց իր հետ մի լավ ծիծաղել կատարվածի վրա:

Անջելինայի ոտքը

«Օսկարում» կարմիր գորգին լուսանկարվելիս նրա ոտքի դիրքը պայթյուն առաջացրեց մամուլում, մինչդեռ դերասանուհին որևէ մեկնաբանություն չարեց դրա վերաբերյալ՝ այսկերպ ցույց տալով իր ինքնավստահությունը:

Լավագույնը, որ կարող ես անել քեզ համար

Փորձագետները փաստում են, որ վերալիցքավորվելու համար անհրաժեշտ է խստիվ հետևել «Ժամանակ ինձ համար» կատեգորիային: Իսկ Cosmo-ի հարցումները ցույց են տալիս, որ դու շատ քիչ ես պահպանում այս կանոնը: Իսկ այն շատ պարզ է`

«Ժամանակ ինձ համար»,

«Ժամանակ ընկերներիս համար»,

«Ժամանակ սիրելիիս համար»։

Կատարյալ կլիներ, եթե դու դրանք բաժանեիր հավասար երեք կտորների: Չի՞ ստացվում։ Ուրեմն գերիշխողը պետք է լինի հենց «Ժամանակ ինձ համար» հատվածը:

• Մենակ ռոմանտիկ կոմեդիա դիտիր. ստիպված չես լինի հուզիչ պահերին զսպել արցունքներդ:
• Գնա գեղեցկության սրահ, հարդարիր եղունգներդ, իսկ եթե շատ ժամանակ ունես, մարմնի մերսում անցիր:
• Ընկերոջդ հետ հանդիպմանը մի փոքր շուտ գնա և մենակ մեկ գավաթ գինի վայելիր:
• Շաբաթ օրն արա ամեն ինչ, որպեսզի շուտ վերջացնես գործերդ և ամբողջ երեկո թավալ տաս բազմոցին:
• cosmo.am