Սթրինգերին դժվար է հարմարվել: Փոխարենը դրանից հետո անհնար է պատկերացնել այլ ներքնազգեստ: Եվ, ամեն դեպքում, վերջին շրջանում կանացի զգեստապահարանի այդ սովորական առարկայի շուրջ բազմաթիվ լուրջ քննարկումներ են ընթանում: Կարելի՞ է, արդյոք, սթրինգն անվտանգ ներքնազգեստ համարել: Եվ ընդհանրապես, ինչպիսի՞ն պետք է լինեն կանացի կիսավարտիքները: Այդ մասին կպատմի գինեկոլոգ ՄարինաԱնանյանը:

«Վերջին շրջանում գիտնականները, ամեն դեպքում, ապացուցեցին, որ սթրինգերի նեղ գիծը նպաստում է հետանցքից սեռական օրգաններ մանրէների փոխանցմանը: Այնպես որ, ավելի լավ է այդ սեքսուալ ներքնազգեստը պահել ռոմանտիկ գիշերվա համար, այլ ոչ թե առօրյայի: Նույնը վերաբերում է սինթետիկ ներքնազգեստին: Այն օդ չի թողնում՝ քրտինք առաջացնելով եւ բարենպաստ պայմաններ ստեղծելով այնպիսի տհաճ անակնկալների առաջացման եւ զարգացման համար, ինչպիսիք են պապիլոման, կաթնուկը եւ դիսբակտերիոզը: Ընդ որում, ինչպես տղամարդկանց, այնպես էլ կանանց մոտ: Պարզապես կանայք հիվանդությունների նախանշաններն անմիջապես զգում են, իսկ տղամարդիկ դրանց փոխանցող են հանդիսանում՝ երբեմն տարիներ շարունակ տեղյակ չլինելով այդ մասին:

Ներքնազգեստը պետք է կարված լինի միայն բնական կտորներից, չպետք է կոպիտ կարեր ունենա, եւ դուք չպետք է այն զգաք: Շատ օգտակար է գոնե գիշերը հանգստանալ սեղմող ներքնազգեստից, բայց այդ դեպքում հաշվի առեք, որ ձեր անկողնու սպիտակեղենը նույնպես պետք է մաքուր, արդուկված, ձեռք տալիս բնական եւ հաճելի լինի: Եվ Աստված մի արասցե անկողին թողեք կենդանիների: Նույնիսկ տնային կենդանիները բազմաթիվ վարակների փոխանցողներ են, որոնք միայն սպասում են նախ ձեր անկողին, հետո արդեն՝ օրգանիզմ ընկնելուն»:

NEWS.am STYLE